एक वादळ थांबलं
आणि बातमी वार्‍यासारखी पसरली
कित्येक उसासे हुंकार हवेत शांत विरून गेले
एक वादळ थांबलं
पालापाचोळा लांब चेहरा करून पडून राहिला
गतिहीन दवाचा गहिरा बोजडपणा उरी घेऊन
एक वादळ थांबलं
आणि खिडक्या अस्तित्वहीन झाल्या
आता कसलीच आदळाआपट होत नाही
एक वादळ थांबलं
आणि झुळुक ही हळवी झाली
फुंकर विरून गेली थरथरणार्‍या ओठांत
एक वादळ थांबलं
त्या वादळाचं आत्मचरित्र कोणी धरून बसलं
न फडफडणार्‍या निर्जीव पानांत वादळ बंदिस्त करण्याचा वेडा अट्टाहास
एक वादळ थांबलं
त्याला आता खूप दिवस झाले
तरी वादळाचे भास अवतीभोवती घोंघावत असतात
एक वादळ थांबलं
कोणाला त्याचा विशेष फरक पडला नाही
कुठेतरी दूरवर कुणीतरी आतून समूळ हललं एवढं मात्र खरं
एक वादळ थांबलं
मग पुन्हा सुरू झालं वादळ .. आठवणींचं
मग पुन्हा सुरू झालं वादळ .. आठवणींचं
उरली उगाचची ओली घुसमट
एक वादळ थांबलं
आणि ते थांबणारच होतं कधीतरी
पण इतक्यात उद्ध्वस्त व्हायची तयारी नव्हती मनाची
एक वादळ थांबलं
तोच सुरु झाला एका वायुहीन पोकळीतला अगम्य प्रवास
प्रसाद साळुंखे
कोणत्याही टिप्पण्‍या नाहीत:
टिप्पणी पोस्ट करा